Tjåhkanibme mannoæládusá ja kultuvra birra æládussan

Fáhkajuohkusin li vidás gudi barggi mannoæládusáv, kultuvrav ja kultuvrraárbev, ja kulturmujtojt prosjevtan: “Árvulasj merragáddekultuvrra” ja dutkamprográmmajn VRI-mannoæládus. Juogos le ådå strategijajt biedjamin divna dájda nammadum suorgijda, ma vas galggi fylkkadikken gålgismánon jagen 2010 ássjen giehtadaláduvvat.
 
Tjåhkanime åvddålasj oahpestuváduvvin Árranin. Tjåhkanime tiebmán lij “dáhpádusæládusáj” máhttelisvuodaj birra mannoæládusájn ja gåktu aktisasjbarggo Árrana ja fylkkasuohkana gaskan máhttá nanniduvvat. Árran sihtá åvddånbuktet diedojt sáme vidjurij birra dájn guovlojn majt vas iehtjáda máhtti ávkken adnet, Árranav mannomåhkken buoredahttet, ja aj ietjáláhkáj åvddånbuktet ja lasedit guovlo mannomåhkijt. Dán aktijvuodav de Árran oajvvadij jut rahtjama mannoæládusáj hárráj máhtti aj gehtjaduvvat bájkkeåvddånahttemdåjmaj gáktuj Måsken ja Ájluovtan.