Præssadiedádus: Árrana ja Várdobáiki aktisasjæjvvalibme varresvuoda birra

Bierjjedakideda biehtsemáno 25. biejve de tjåhkanin lågenangålmås gudi varresvuoda æjvvalimijt tjuovvu Ájluovtas, Gásluovtas, Strávvenjunjes ja Stuorgiettes bussav tjuovotjit Evenássjáj ja Várdobaiki sáme guovdátjij. Ulmutja vuojnunagá ja gulunagá  lidjin buorre ja tjierggis mielan vuolgátjit, ja gå jåvsådijma de duostoduvájma sæmmi vuorddagij. 

 

Várdobáiken lij Tone Elvebakk guhti mijáv duostoj, sån le prosjevta jådediddje ja bæjválasj doajmme jådediddjen. Dåppe oattjojma gullat oanegattjat Várdobáike birra ja márkosáme histåvrås, ja vil buoragit vuosádussaj oahpesmahteduvájma. 

Æjvvalibme varresvuoda birra lij ietjá sajen, Luobakájde sijddavieson, dåppe de æjvvalijma oasseválldij Evenássjes ja Skánes gudi de lidjin mijáv Nuortta-Sáltos káfajn ja váffalij vuorddemin. Muhtemijda lij dát alvadussan ja hávssken gå æjvvalin oahppásij ja berrahij.   

 

Avtav gaskav lij aktisasj sámegiela låhkåmhárjjánibme. Julev ja márkosámegiela buohtastahteduvvin ja muodagasjvuoda lidjin ållu tjielggasa gå oassevállde mañenagi åvddånbuktin duodde diedojt gåktu muhtem bágov ja moallánagáv javlli ja adni.  

Várdobáike varresvuohtaæjvvalimijn le agev aktisasj lásjmudallam. Dán bále lij ja ájádusáj sissta dågij goarññot, giergij låggñot, ja syhkaldit. Oassevállde dahppaluvvin ja bårråmmiellaj båhtin! Dan maññela de guossoduvájma njálga gasskabiejvijn avdås de låhpadijma ságastallamij ja ájrrovuobddemijn. 

Gallánam ja ållo vuojtádagáj bussaj tjåhkkidijma Hársstáj. Muhtema lidjin dal guhkebuv ganugit, valla sijáv jaskadip plánajn jut aktisasjtjåhkanibme le vas vuordon tjaktjaj jali dálvváj. 

Hárstan lij bæjvádahka ja fæsstaspela, ja ållo máhttelisvuodajs oasestit dan ånigasj guovte tijman mij miján dåppe lij. 

 

Manádibme Várdobáiken lij hávsskes ja buorre loahppa dán jabe æjvvalimijda. Mij nannijma báttijmat gasskanimme ja suohkanij rájáj rastá aj, ja oattjojma buorre rádijt gåktu æjvvalimijt åvddålij guovlluj ásadit. 

Árrana bieles lip gijttevattja gájkajda gudi lidjin fáron Nuortta-Sáltos, gákjajda Evenássjes ja Skánes.  Ja diedon lip gijttevattja Várdobáiki sáme guovdátjij ållu buorre ja hávsskes dáhpádusás!   . 

Rágatmáno de vas vuojnnalip, gå de vas varresvuoda æjvvalimij álggep mihtos Laila Spikajn Jåhkåmåhkes, guhti le guddnebálkkidum kulturbargge, lågådalle, koahkka, duodjár j.m.á, ja gænna li ållo máhtukvuoda sáme kultuvrraárbes. Rágatmáno boahtá sån ierit ietján ságastittjat man láhkáj bájkálasj luondos biebmov ja dálkkasijt ávkástallat, ja bessap aj suv mañen luondos dárbbagijt tjoakkátjit majt maññela oadtjop muossádissaj biebbmuj, majt vas de  lip Laila Spika bagádallamij milta dahkam.