Julevsáme nuorajt tjoahkkit

Roadtrip, njuovvam ja rádnastallam. Dá li nágin bágo majna Anne Silja Turi boahtte giellabiese sisanov tjielggit sihtá. Sån aktan Anna Kajsa Airajn ja Elli-Ristin Tuordajn pláni julevsáme nuorajt tjoahkkit hávsskes ájllegij Jåhkåmåhke guovlon. – La ájnas mij æjvvalip ja oahpástuvvap rájáj rastá, ja la hávsske gå dá bále Svierigabielen sjaddá, javllá Anne Silja Turi dán æjvvalime birra. 

 

Goassa?    ragátmáno 17.-19. biejvijt 2010

Gånnå?    Jåhkåmåhke guovlon

Gejda?    16-30 jagágijda

 

Roadtrip. Vuonabieles ragátmáno 17.biejve vuoddjáp. Jåhkåmåhkkoj árra iehkeda jåvsådip. Svierigabiele nuorajt iejvvip. Bårråp. Rádnastallap. Gåhtsep. 

 

Njuovvam. Plána milta Unna Čerutja njuovvamav ålles biejvev tjuovvot galggap. Gæhttjap. Gulldalip. Ságastip. Oahppap. Per-Eric Kuoljok mijá siegen galggá liehket.

 

Rádnastallam. Rájáj rastá la ájnas oahpástuvvat. Miján la sæmmi giella Vuonan ja Svierigin, ja danen la ávkálasj ja hávsske nuoraj oahpástuvvat gudi iehtjama gielav bukti. Ságastallap. Suohtastallap. Tjajmmap. Rádnastallap. Dán láhkáj værmádak stuorru.

 

Árran julevsáme guovdásj giellabiesse-prosjevtav 2009 gidá álgadij. Dåjma oajvveulmme le julevsámegielav nannit, ja njálmálasj giellamáhtudagáv ja adnemav lasedit. Jur dát prosjækta le 16-30 jagágijda hiebaduvvam, gudi julevsámegielav muhtem mærráj dádjadi, valla e duosta ságastit ja dajda gudi gielav juo bukti.

 

Diededime ájggemierre le ragátmáno 10.biejvve 2010. (NB! Dajda gudi guhkket båhti la sierraláhkáj ájnas diededit, váj manov ja årromav máhttep plánit.)

 

Dá dåjma li alkoholahtes ja nuora NÅVGÅ bessi sæbrrat!