Giellabiesse oassen Julevsáme vahkos

Doajmmasiebrre julevsábme Julevsáme vahkov Måsken ásadi, gånnå ulmutja duodjekursav, biebbmokursav jali bállotjiektjamskåvlåv máhtti tjuovvot.

 

Giellabiesse le aj oassen dán vahkos, mij mánnodagá sjnjilltjamáno 12.biejve álggá. Dá bále giellabiesse moatte åsijda juogeduvvá, danen la vejulasj válljit majt tjuovvot. Vahkko várrevádtsemijn álgaduvvá, Ájláttes Måsskoj. Dát la manno 16-30 jagágijda, gudi julevsámegielav muhtem mærráj dádjadi, valla e duosta ságastit ja dajda gudi gielav juo bukti. Várrevádtsem la giellabiese stuorámus oasse, ja aj ájnna ásadibme masi åvddågiehtaj viertti diededit.

 

- Julevsáme vahko galggap Måsken vuojnnut ja gullut, danen dijstagá (13/7) giellagoadev tsieggip, mij ålles vahkov anon galggá liehket. Giellagoaden galggap dåssju sámástit, javllá Anne Silja Turi, gut giellabiesijn barggá. - Gájka li buorisboahtem dåjmajda danna sebratjit, dajda ij dárbaha diededit, ij la ietján gå boahtet! Dá dåjma iehkedijt sjaddi, váj la vejulasj duodje- ja biebbmokursajda biejvijt sæbrrat.

 

Árran julevsáme guovdásj giellabiesse-prosjevtav 2009 gidá álgadij. Dåjma oajvveulmme le julevsámegielav nannit, ja njálmálasj giellamáhtudagáv ja adnemav lasedit. Jur dát prosjækta le 16-30 jagágijda hiebaduvvam, gudi julevsámegielav muhtem mærráj dádjadi, valla e duosta ságastit ja dajda gudi gielav juo bukti.

 

 

Sámedigge dáv dåjmav doarjju.

 

Facebook: “Julevsáme giellabiesse 2009/2010”