- Buorren dåbddu gå le luondulasj sámástit

Árran giellabiesse-prosjevtav gidán 2009 álgadij. Dåjma ulmme le julevsámegielav nannit, ja njálmálasj giellamáhtudagáv ja anov lasedit. Dát prosjækta le hiebaduvvam 16-30 jagágijda gudi julevsámegielav muhtem mærráj dádjadi, valla e duosta ságastit ja aj sidjij gudi gielav juo máhtti.

Sanna Vannar (16) Jåhkåmåhkes lij vuostasj bále Árrana giellabiesen, ja soaptsoj. Suv mielas le ájnas rijkkarájáj rastá barggat:

-Ájnas le munji dåbddåt dáppe besav ja galgav sámástit. Dat le nav buorre dåbddo sierraláhkáj gå diedáv då ietjá oassálasste aj sæmmi láhkáj dåbddi. Mij ham álu sjaddap dåbddåt lip dåssju muhtem gallegattja gudi sámásti dåjn mijá sijdabájkijn ja navti sjaddá miján sierralágásj aktijvuohta, javllá sån.

 

Árrana rádevadde Lars Filip Paulsen lij aj fáron guollimin:

- Mån lav esski dán virggáj álggám, galgav dal boahtte giellabiesijt plánigoahtet, galggi edesik guokta vil dán skåvllåjage ja diedon aj Julevsáme vahkon snjilltjamánon dagu lip åvddåla ásadam. Galgav dal ienep oassálasstijt ”guollit”, javllá Paulsen.

Giellabiesse-prosjekta le ruhtadårjav oadtjum Sámedikkes ja Nordlánda fylkkasuohkanis. Árrana direktørra Lars Magne Andreassen le gijttevasj gå oajválattja dákkir dåjmajt doarjju. Luluj aj luondulasj jut Divtasvuona suohkan maŋenagi dákkir dåjmajt doarjju danen gå suohkana guovtegielakvuodarudá dåjmaj milta juolloduvvi. Dát le dal goalmát jahke mij giellabiesijt ásadip. Hæhttup sámástit Árrana ja skåvlå ålggolin jus gielan galggá boahtteájgge, ja giellabiese li dal boahtám stuoves årnigin. Julevsáme giella Árranis vuoroduvvá, låhpat Andreassen.